El Partíu Asturianista (PAS) quier amosar la so más fonda llercia pol “histéricu” ataque del PSOE y del PP (per aciu de los sos portavoces Sra. Migoya y Sr. Aréstegui respectivamente) escontra la propuesta del Ayuntamientu de Cangas d’aponderar el conocimientu de la Llingua Asturiana nel concursu d’accesu a l’emplegu municipal nel Conceyu, sofitándose na Llei d’Usu y Promoción de la Llingua Asturiana.

Dende’l Partíu Asturianista (PAS) venimos denunciando cuantayá l’incumplimientu de dicha Llei pol Gobiernu Asturianu (PSOE-IU) de magar entamaron xuntos na llexislatura cabera, hasta la d’anguaño. Asina qu’abellugase nesa Llei pa baltiar la propuesta del Ayuntamientu de Cangas, ye una BURLLA ya un DESPRECIU pa con tolos asturianos por parte d’esti Gobiernu del PSOE ya IU.

D’otru mou, el PAS confirma el CINISMU del PP, que denuncia al altu la lleva l’atozu del PSOE (per aciu de la so herramienta mediática) pa desprestixalo y nun s’esmolez un res n’echa-y una gabita nel arrequexamientu de la Llingua Asturiana, combayando col PSOE-IU nel esaniciu de la mesma.

Por too ello, del Partíu Asturianista (PAS) sofita al Ayuntamientu de Cangas y encamientalu a caltener la propuesta.