Los resultaos electorales coméntense con bastante facilidá, son tresparentes abondo. Nel conxuntu d’España crecen los dos grandes partíos centralistes, PSOE y PP, anque, ente sí, caltienen sustancialmente les distancies relatives que teníen. Dientro eses dos faces ye posible estremar dalgunos de los parámetros constituyentes de la componente final y señalar que’l PP paez crecer un pelín más y que seguramente lo fai a costa d’un plizcu al votu del PSOE o bien al votu arrimáu a sí que nel 2004 coló pa los socialistes. Pel so llau, el PSOE epoxiga a base de —como un pulpu— sorber la cañamina d’IU y ERC dexando enteru’l cascu. Dotramiente, BNG, CiU, PNV, CC caltienen sustancialmente’l so electoráu. La sustancia d’estos datos ye que la sociedá española caltién básicamente idéntica la so estructura emocional-política y simplifícala, apurando’l bipartidismu, y eso ye lo que se traduz na representación.

Anque la esapaición de la Chunta Aragonesista podía arreyase a la ausencia de Labordeta, nun puede dexar de xuntase esti datu colos d’IU y ERC (y el Partíu Andalucista na so faza) nuna llinia interpretativa que —sobre la xeneral de que’l pequeñu que pacta col grande tiene a perder— apunte entá más allá: el que se paez demasiao a otru y nun ye más qu’un alter ego o un famulus d’elli acaba por vese como prescindible, porque ¿pa qué repetir con males copies l’orixinal?.

L’apaición de UPyD y Rosa Díez —con xente que fundamentalmente provién del ámbitu del PSOE y, especialmente, d’Euskadi, esto ye, de xente qu’afuxó espantada de la política del PSOE—, con dellos cientos de miles de votos en toa España, demuestra qu’hai un grupu grande d’españoles que tarrez a PSOE y PP y que quier otra política, de corte nada nacionalista y nada sectariu. Si los condicionamientos de la llei electoral nun fueren los que son, ensin dulda munchos miles de persones más tendríense animao a votalos.

Finalmente, la participación electoral ye sustancialmente la mesma de siempre, lo que quier dicir que l’universal discursu contra la política y los partíos nun ye más que retórica y, a lo más, un mecanismu d’autoxustificación de la mala concencia los votantes.

N’Asturies les coses son entá más clares: los socialistes ganen al PP dempués de doce años. Qu’ello ocurra pese al incumplimientu pol PSOE de toles sos promeses dende fai llustros, y pesie a que nin siquier había cartel del candidatu d’equí, quier decir munchu sobre’l tipu de campañes que son les xenerales, sobre’l tipu de partíu que ye’l PSOE y sobre los votantes asturianos (a los que too eso paez importa-yos una llámpara gaviotera). En cuantes al PP, nun sabremos inxamás si’l fracasu se debe a la presencia de Gabino al frente de la candidatura (a que a los votantes nun-yos prestare la boína —y nun lo tomen a broma—, a que nun cuacase que fuere alcalde d’Uviéu…) o a un cansanciu xeneral sobre’l PP n’Asturies. Tocántenes a IU, sigue’l procesu xeneral de toa España, anque equí —más refractaria a la realidá la nuestra sociedá qu’otres— el retrocesu sea menor. En tou casu, ábrese agora un procesu d’engarradielles n’IU que va tener n’Asturies la so repercusión, probablemente grave y con consecuencies sobre la estructura de fuerces polítiques nel futuru.

Tocántenes al votu asturianista, val con dexalu puestu: Andecha, 1269, Unidá, 833. Total 2.102. Un partíu ausente de l’actividá diaria como LV-GV sacó 1777 votos, UPyD, 9399. Nel día de güei l’asturianismu ye, cenciellamente, invisible pa la sociedá asturiana. Y ehí enxértase esa otra mozaína de sedicentes asturianistes que tendrán votao a los partíos centraliegos, principalmente PSOE e IU, que son pa ellos —cuando llega la hora la verdá— la verdadera patria.

Asina son les coses: el pueblu soberanu vota lo que quier, lo mesmo nes urnes que pa Eurovisión. Como decía una amiga mía —sé lo que vota, pero nun lo voi decir—, nes primeres hores del llunes 10 de marzu, al respective del Chiquilicuatre, «claro, dejas a la gente votar, y luego ya se sabe lo que pasa». Verdá que, dempués, al dase cuenta les consecuencies, dio un glayiúcu y atapóse la boca.

«Hebia salú«, dicho sea al mou y manera del señor Escanlares.

Fdo. Xuan Xosé Sánchez Vicente
Presidente del Partíu Asturianista (PAS)

• Entrada Anterior: ¿Y Ceuta y Melilla?
• Siguiente Entrada: Euskadi: mirar de frente al mal y verlo sin engaño