Cuatru notes.Una: el sábadu, 2 de xineru, hubo manifestación d’apoyu al alcalde asturianista, Cándido Vega, en Ponga. Como recoyeren todos los medios, la presencia de xente fue bayurosa, unes doscientes (contaes una a una) persones. Si se fai la traducción a la población que tien el conceyu y se fae’l descuentu d’enfermos, medraniegos, votantes acérrimos d’otres formaciones, etc., la suma tien un significáu de “práctica totalidá”. Destacable: la presencia de xente del PP, de Ponga y de fuera, dellos significaos, ente los manifestantes.
Dos: Cuando al PSOE-y faen mociones de censura, los que sofiten al partíu que-y les fai son “apestosos tránsfugues”. Cuando eses mociones lu favorecen, son “conceyales qu’acontien la llista más votada” (col PP, nun crean, ocurre lo mesmo). Consecuencia: el “pactu antitransfuguismu” nun ye más qu’una mázcara hipócrita y santurrona pa disimular lo que son de verdá PP y PSOE: dos grandes negocios de poder y empléu que tán a lo que pillen, ensin importa-yos un pitu los ciudadanos.
Tres: El trabayu de la mayoría asturianista vese per tou Ponga. L’asturianismu convirtió un conceyu en recesión y ensin atenciones a los vecinos, nun conceyu con obres, entusiasmu y progresu.
Cuatru: El PSOE fala del “desgobiernu” de Ponga. Habrá que recordar que, cuando’l pactu Unión Asturianista (URAS-PAS) garró’l gobiernu del conceyu, el PSOE (que “gobernó” en Ponga dende siempre) llevaba dos años gobernando y gastando ensin presupuestos (¡dos años ensin presupuestos!). Estos el cementu deben usalu sólo pa afatase la cara.
Pueden lleer les noticies d’ayer 03/01/2010 en:
