Ñacíu nel 1949 (1 de febreru), llicencióse en Filoloxía Románica (Español) algamando la Cátedra de Lliteratura del Institutu d'El Infiestu (Piloña), nel 1972, n'oposición llibre. Fue entamador de Conceyu Bable y de la sección periodística del mismu nome na revista Asturias Semanal. Ye miembru de númeru de l'Academia de la Llingua Asturiana dende la so fundación. Perteneció al Partíu Socialista Popular d'Asturies, nel que fue secretariu de cultura y secretariu xeneral. Dempués de l'amestadura d'aquél col PSOE, militó na Federación Socialista Asturiana, onde fue vocal de cultura y, comu conceyal per Piloña nes eleciones de 1979, aportó a los cargos públicos de diputáu pel partíu xudicial de Cangues d'Onís, miembru del Conceyu Rexonal d'Asturies y de la Xunta Xeneral del Principáu, na que fue portavoz del PSOE y secretariu del Grupu Parlamentariu d'esi partíu. Darréu d´estos cargos presidió durante cuatru años la Fundación Pública de Belles Artes y la Fundación Pública de Cueves y Yacimientos Prehestóricos, al mesmu tiempu qu'empobinaba la comisión de cultura de la Diputación. Baxu les sos responsabilidaes abriose'l Muséu de Belles Artes d'Asturies, qu'él punxo en marcha ; la Orquesta Sinfónica d'Asturies (güei OSPA) algamó'l nivel qu'agora caltién ; y, ente otres coses, entamose una llarga y granible collaboración col Departamentu de Prehestoria la Universidá d'Asturies, al través de cierres de cueves, publicaciones didáctiques y científiques, el sofitu al Proyectu Nalón, etc. Durante esa estaya, asinamesmu, abrióse al públicu La Cuevona de Ribesella y entamóse'l proyectu didácticu del complexu de Tito Bustillo.

Nel 1983 diose de baxa nel PSOE por ausencia de daqué política autonómica y de proyectu p'Asturies d'esta organización .

Nel 1985 funda'l Partíu Asturianista (PAS), del que ye presidente dende l'entamu. Dende 1991 (y hasta 1999) ye diputáu nel Parlamentu asturianu por esta fuerza nacionalista, llegando a importantes alcuerdos col gobiernu de Sergio Marqués, como la destacada Llei 1/98, d'Usu y Promoción del Bable/Asturianu.

El dificil panorama económicu, políticu y social asturianu, nel que les diferencies col restu d'España agrándense d'añu n'añu (pese a los continuos incentivos económicos recibíos), onde l'economía asturiana nun ye capaz d'algamar dinamismu pa medrar y crear empléu, onde la población activa ye baxa, les muyeres nun son quién a incorporase al trabayu, y los más mozos tienen qu'emigrar, cola traxedia personal y l'enorme despilfarru social y de recursos qu'esto supón, fai de revulsivu pa que nel 2004 xunto con Sergio Marqués formen la coalición UNIÓN URAS-PAS (UNIÓN ASTURIANISTA).

Entamador y afalador del Surdimientu asturianu dende 1974 (empobinando la faza "Conceyu Bable" na revista Asturias Semanal y aniciando posteriormente la sociedá Conceyu Bable, ente otres xeres), Xuan Xosé Sánchez Vicente tien asoleyaos, hasta agora, los llibros de poemes: Camín de señardaes (1980), Poemes de Xixón (1981), De reidores costes (1988), ...Y de llastientes picos (1999), As de corazón es/y/es (2001); les ediciones de clásicos: Esvilla de poesíes na llingua asturiana (1979), Clásicos asturianos I (1982), Clásicos asturianos II. Lliteratura relixosa (1983), Poesíes asturianes completes de Xosé Caveda y Nava (1989); los llibros de narraciones Cuentos de llingua afilada (1984), Lluna llena (1990), los relatos "El Comuñeru", en Trabajos del I Concurso de Cuentos, convocado por el Centro Asturiano de Madrid (1979), y "Aquella mañana", en Premio "Boroña de Plata" de Cuentos (1985); la novela La muerte amiya de nueche (1984); la obra de teatru El Pelayu (1985) y Esta danza ye la vuestra, si ye que vos presta (Teatru. Obra completa) (1992); la narración en versu pa neños La estrella que subiere al cielu (2001); una Antoloxía Lliteraria (prosa y versu), publicada por el Atenéu Obreru de Xixón (2001); los ensayos La cultura popular asturiana: unidá y pluralidá (1985) y La cultura asturiana: dialéctica, narrática y proyectabilidá (1999); l'estudiu-ensayu Mitoloxía asturiana. Refraneru (a comuña con Xesús Cañedo Valle) (1986); l'ensayu Los dioses derrotaos (mitoloxía asturiana) (2001) (tamién a comuña con Xesús Cañedo Valle); una historia de la lliteratura asturiana contemporánea, Crónica del Surdimientu (1991); un ensayu sobre política y socioloxía asturiana, El hilo de Ariadna (1991), un llibru qu'enxerta una riestra d' ensayos y discursos sobre la política asturiana, Teoría y práctica d'Asturies (1999); el Diccionariu de la Llingua Asturiana (1988) y el Diccionariu Asturianu - Castellanu, Castellanu - Asturianu (Primera edición, abril 1996; primera reimpresión, payares 1968; segunda edición, mayu 2002); los estudios "La lengua asturiana y el Estatuto de Autonomía", en Las lenguas nacionales en la Administración. Diputación Provincial de Valencia, Valencia, 1981; "La sidra a través de la historia" y "Vocabulario de la manzana y la sidra", en el libro colectivo Sidra y manzana de Asturias (1994) y "Lésicu de la cocina n'Asturies", en El libro de la gastronomía asturiana (Silverio Cañada, editor, 1996), "Dellos apuntes sobre la influencia de Caveda", en IV Xunta d'escritores asturianos. Lliteratura asturiana nos 90", Gobiernu del Principáu d'Asturies, Conseyería d'Educación, Cultura, Deportes y Xuventú, Uviéu, 1997; "Algunas notas sobre la paremiología asturiana relativa al cuerpo, la enfermedad y la alimentación", en La Medicina Popular Española. Trabajos dedicados al Dr.D. Antonio Castillo de Lucas en el centenario de su nacimiento. Joaquín Fernández García y Antonio Castillo Ojugas, editores. Uviéu, 1998. "Una nota sobre'l significáu del versu 12 de "Didu y Enees" de Marirreguera, n'Antón de Marirreguera y el Barrocu Asturianu. D.D.A.A., Gobiernu del Principáu d'Asturies, Conseyería d'Educación, Cultura, Deportes y Xuventú, Uviéu, 2000. Nel añu 2001 apaeció un guapu resume de la so obra de creación, Antoloxía lliteraria.

Nos últimos años vien dedicándose con enfotu al estudiu de la lliteratura asturiana. Frutu d'esti trabayu ye'l so llibru Les producciones clasicistes d'Antón de Marirreguera. Un ensayu de métodos creativos, estética lliteraria y ideoloxía del discursu críticu sobre la nuestra lliteratura (2004). Collaborador en distintos diarios y selmanarios asturianos, asina como en revistes especializaes, últimamente vien publicando delles recopilaciones d'estos trabayos, como Lletra y llingua (2003), Litora cantabrica (Estudios lliterarios y llingüísticos) del 2004, Ríu Nalón (Estudios lliterarios y llingüísticos), publicáu nel añu 2005 y agora Ríu Deva (2006), nel que recueye dellos artículos sobre sociollingüística y política asturianista, publicaos nos últimos años en diferentes periódicos del país, y Antología de la poesía asturiana del XIX (2006).

Nel BLOG de XUAN XOSÉ pues lleer a diariu los sos comentarios d'actualidá

EQUÍ pues consultar los últimos artículos de Xuan Xosé Sánchez Vicente

EQUÍ pues ponete en contactu con Xuan Xosé Sánchez Vicente